Кыргызстанда жаңы эл аралык «Жалал-Абад» аэропортунун курулушу жүрүп жатат. Ал Сузак районундагы Багыш айыл аймагында курулууда. Аэропорт үчүн 381 гектар жер бөлүнгөн.
Курулуш иштери 2025-жылдын май айында башталган. Долбоор боюнча учуу-конуу тилкесинин узундугу 3800 метрди түзөт. Үч кабаттуу терминал саатына 350 жүргүнчүнү тейлей алат.
Аэропорт 4Е эл аралык категориясы боюнча долбоорлонууда. Бул Boeing жана Airbus сыяктуу ири учактарды кабыл алууга мүмкүндүк берет.
Долбоордун негизги көрсөткүчтөрү
Алдын ала эсеп боюнча курулуштун наркы 60 миллион долларды түзөт. «Кыргызстан аэропорттору» ААКсы так сумма иш бүткөндөн кийин жана каржылык эсептешүүлөр аяктагандан кийин өзгөрүшү мүмкүн экенин белгиледи.
Акыркы жарыяланган пландар боюнча аэропорттун курулушу 2027-жылдын үчүнчү кварталында бүтүшү күтүлүүдө. Жаңы авиациялык комплекс шаардын ичинде жайгашкан жана өнүгүү мүмкүнчүлүгү чектелген учурдагы аэропортту алмаштырат.
