Кара-Балта, Жайыл жана Панфилов райондорунун тургундары менен өткөн жолугушууда Курама айыл аймагынын Жайыл айылынын тургуну Эдик Жапаров мамлекет башчысына маанилүү маселелерди көтөрдү.
Анын айтымында, райондо сугат суусуна муктаж болгон 100дөн ашык майда дыйкан чарбалары бар. Тургуну «R-3» каналын оңдоп берүүнү суранып, айылда борборлоштурулган ичүүчү суунун жоктугун белгиледи. Учурда ар бир үй-бүлө өз алдынча 15-20 метр тереңдиктеги скважиналарды казуу менен суу ичип келишет.
Президент Садыр Жапаров бул маселелерди карап чыгуу үчүн Суу ресурстары, айыл чарба жана кайра иштетүү өнөр жайы министрлигине тапшырма берди. Ошондой эле, каналдардын абалы жана күтүлүшү үчүн ведомство толук жооптуу болушу үчүн ички каналдарды министрликтин балансына өткөрүп берүүнү буйруду.
Айыл чарба министрлигинин өкүлү 2026-жылы Чүй облусунда 40 чакырым канал тазаланганын билдирди. Министрлик 2027-жылдан баштап өзүнүн балансындагы ички сугат каналдары менен иштерди жүргүзүүнү пландап жатат.
Ичүүчү суу маселесине токтоло келе, Президент келерки жылы 150 айылды таза суу менен камсыз кылуу пландалып жатканын белгиледи.
