Ош драма театрынын спектакли республикалык фестивалдын баш байгесин алды

Ош улуттук драма театрынын «Күнөө» спектакли XIV республикалык театралдык фестивалдын баш байгесин жеңип алды. Бул тууралуу Маданият, маалымат жана жаштар саясаты министрлиги билдирди.

Фестиваль 26-октябрдан 30-октябрга чейин өтүп, кыргыз профессионалдык театрынын 100 жылдыгына жана Кыргыз Республикасынын Баатыры Кулуйпы Кондучалованын элесине арналды.

«Күнөө» спектаклин режиссёр Баатырбек Шамбетов койгон. Ал мыкты режиссура номинациясында да жеңип, 150 миң сомдук сыйлык алды.

Башка байгелер

• Биринчи орунду «Учур» мамлекеттик жаштар театрынын «Өлөрман эне жана анын балдары» спектакли алды — 700 миң сом.
• Экинчи орун Токтоболот Абдумомунов атындагы Кыргыз улуттук академиялык драма театрынын «Атанын тагдыры» спектаклине ыйгарылды — 500 миң сом.
• Үчүнчү орунду Алай музыкалык-драма театрынын «Куса» постановкасы ээледи — 350 миң сом.

Калыстар тобу ошондой эле мыкты эркек жана аял ролу, сценография, музыкалык жасалгалоо, режиссура жана актёрдук ансамбль сыяктуу атайын номинациялар боюнча да жеңүүчүлөрдү аныктады.