Энергетика министрлиги эскерткендей, Камбар-Атин ГЭС-2нин ачык суу агызуучу жайы курулбаса, объект суу астында калышы мүмкүн. Себеби азыр ГЭС-2де бир гана генератор иштеп, сууну ошол аркылуу өткөрүүгө туура келет.

Камбар-Атин ГЭС-2де азыр бир гана генератор иштеп жатат, сууну ошол аркылуу гана өткөрө алабыз. Эгерде суунун көлөмү эки эседен ашса, ГЭСти суу жууп кетүү коркунучу бар. Бул коркунучтун алдын алуу үчүн ачык суу агызуучу жайды куруп жатабыз.
Курсантбек Өмүрбеков, энергетика министринин биринчи орун басары

Жогорку Кеңеш 28-октябрда Камбар-Атин ГЭС-2нин ачык суу агызуучу жайын курууга Евразия турукташтыруу жана өнүктүрүү фондунун насыясын ратификациялоо макулдугун биринчи окууда жактырды. Келишимге 2026-жылдын 16-июлунда Бишкекте кол коюлган.

Депутат Болот Борбиев Кара-Жыгач айылынын тургундарынын сугат суусу менен камсыз болбой жатканын көтөрдү. Анын айтымында, 1970-жылдары суу каптоо аймагынан көчүрүлгөн тургундар азыркыга чейин сугат суусуз жашап келишет.

Ал жакта 500дөн ашык чарба жана 500 гектардан ашык жер суусуз калып жатат. Бөлүнгөн 140 гектар жер үлүшү жана 40 гектар Чек ара кызматынын жери иштетилбей жатат.
Болот Борбиев, Жогорку Кеңештин депутаты

Депутат белгилегендей, Камбар-Атин ГЭСинен өз агымы менен суу алып келүүчү каналдын долбоору даяр, бирок ГЭС-2нин дирекциясы макулдук бербей жатат, себеби бул стратегиялык объект.