Turmush басылмасынын "Тарых инсаны" рубрикасынын кезектеги каарманы — 1941-1945-жылдардагы Улуу Ата Мекендик согуштун катышуучусу, дайынсыз жоголгон деп эсептелген Мамет Жолдошов.

Мамет Жолдошовдун тагдыры тууралуу анын небереси, Кыргызстандын Коргоо министрлигинин "Скорпион" атайын багыттагы отрядынын аскер кызматкери Алтынбек Алымкулов айтып берди.

«Менин чоң атам Алымкул үч бир туугандын бири болгон. Улуусу — Алым, андан кийин Мамет жана Алымкул. Биздин айыл — Жогорку-Май (азыркы Кадыралы). Улуу Ата Мекендик согуш башталганда, 1943-жылы чоң атам Маметти фронтко чакырышкан. Ал 1925-жылы туулган. Ал согуштан кайткан эмес, биз болгону анын 'дайынсыз жоголгон' деп эсептелгенин гана билебиз. Башка маалымат жок. Орусиянын Коргоо министрлигинин Борбордук архивинде да 'дайынсыз жоголгон' деп көрсөтүлгөн. Ал эми менин өз чоң атам Алымкул 1945-жылы чакырылган. Бирок согуш аяктап калгандыктан, аны жарым жолдон кайра кайтарышкан окшойт. Ал такыр дайынсыз жоголгон эмес»
Алтынбек Алымкулов

Дайынсыз жоголгон жоокердин тагдыры

Орусия Федерациясынын Коргоо министрлигинин Борбордук архивиндеги маалыматтарга ылайык, Мамет Жолдошов 1925-жылы Тянь-Шань (азыркы Нарын) облусунун Ак-Талаа районуна караштуу Ак-Тал айылында туулган. Ал 1943-жылы согушка чакырылып, 1944-жылдын март айында "дайынсыз жоголгондугуна" байланыштуу аскер бөлүгүнөн чыгып кеткен.

"Жакынкы туугандары" графасында "энеси Бурулкан Турганбаева" деп көрсөтүлгөн. Алтынбек Алымкулов Бурулкан Турганбаева анын чоң апасы экенин тастыктады. Архивден дагы бир "Жолдошов Малет" аттуу, 1925-жылы туулган белгисиз жоокер тууралуу маалымат табылган.