Министрлер кабинетинин төрагасы Адылбек Касымалиев кол койгон токтомго ылайык, мурун уран казылып, кайра иштетилген жана радиоактивдүү калдыктар жайгаштырылган аймактарда рекультивация иштери аяктагандан кийин радиоэкологиялык мониторинг жүргүзүлүшү керек.
Документтин максаты — радиациялык абалды көзөмөлдөө жана уран өндүрүшүнүн таасирине дуушар болгон жерлердин абалын баалоо.
Жооптуу органдар жана каржылоо
Токтомду ишке ашыруу Өзгөчө кырдаалдар министрлигине, Жаратылыш ресурстары, экология жана техникалык көзөмөл министрлигине жана Саламаттык сактоо министрлигине жүктөлдү.
Каржылоо республикалык бюджеттин тиешелүү жылдарга каралган каражаттарынын жана мыйзамда тыюу салынбаган башка булактардын эсебинен жүргүзүлөт.
Көзөмөлдүн тартиби такталууда
Жарыяланган токтомдун текстинде текшерүүлөрдүн мезгилдүүлүгү, объектилердин тизмеси, радиациялык көзөмөлдүн көрсөткүчтөрү жана жол берилген чектен ашуулар аныкталганда кандай чара көрүлөрү так белгиленген эмес. Бул талаптар документтин тиркемеси болгон бекитилген жободо чагылдырылышы керек.
