Кыргызстанда мамлекеттик чек арадагы радиациялык көзөмөлдү күчөтүү сунушталууда. Азыркы система текшерүүлөрдүн жыйынтыктары боюнча маалыматты борборлоштуруп чогултпайт, бул радиациялык тобокелдиктерди баалоону кыйындатат. Тиешелүү министрлер кабинетинин токтом долбоору коомдук талкууга коюлду.
Документ 2011-жылдан бери иштеп келе жаткан өткөрүү пункттарындагы радиациялык көзөмөл жүргүзүү жобосуна өзгөртүүлөрдү киргизүүнү карайт.
Негиздөө маалымкатында иштеп чыгуучулар белгилегендей, бүгүнкү күндө бажы жана чек ара органдары Жаратылыш ресурстары министрлигине радиациялык көзөмөл системаларынын иши тууралуу системалаштырылган маалыматтарды бербейт.
Маалымат түздөн-түз өткөрүү пункттарындагы ички журналдарга катталат, бирок аны үзгүлтүксүз жыйынтыктоо жана жөнгө салуучу органга берүү каралган эмес.
Документтен
Жыйынтыктоочу маалыматтардын жоктугу өткөрүү пункттарына жана чек арага жакын аймактарга реалдуу радиациялык жүктөмдү баалоого мүмкүндүк бербейт, радиациялык тобокелдиктерди болжолдоону жана коркунучтарга өз убагында жооп кайтарууну кыйындатат
Иштеп чыгуучулар ошондой эле мындай кырдаал радиациялык коопсуздукка мамлекеттик көзөмөлдүн натыйжалуулугун төмөндөтөрүн белгилешет.
Азыркы учурда тереңдетилген радиациялык текшерүүлөрдү жана экспертизаларды өзгөчө кырдаалдар жана саламаттык сактоо органдарынын өкүлдөрү жүргүзүшөт. Бирок Жаратылыш ресурстары министрлиги радиациялык коопсуздукту жөнгө салуу ыйгарым укуктарына карабастан, мындай текшерүүлөрдүн катышуучуларынын тизмесине киргизилген эмес.
Мыйзам долбоору менен Жаратылыш ресурстары министрлигинин катышуусун милдеттүү кылуу жана радиациялык көзөмөлдүн жыйынтыктары боюнча квартал сайын отчёт берүүнү киргизүү сунушталууда. Бул маалыматтарды борборлоштуруп чогултууга жана радиациялык кырдаалга туруктуу мониторинг жүргүзүүгө мүмкүндүк берет.
