Кыргызстандын Айыл чарба министрлигинин маалыматы боюнча, өлкөдө ветеринардык кызматтардын деңгээлин жогорулатуу максатында «Мал аман» деген мамлекеттик ветеринардык ишкана түзүлөт.
Жаңы түзүлө турган мекемеге биринчи этапта болжол менен 1,5 миң жеке ветврачтар кабыл алынып, алар мамлекеттин тапшырмаларын аткарат. Алар арасында малдардын эмдөө иштери, кан анализдерин алуу жана башка ветеринардык иш-чаралар камтылат.
Ветврачтар аткарган мамлекеттик тапшырмалардын сапатына жараша 30–40 миң сом айлык маяна алышат. Мындан тышкары, жаныбарларды дарылоо, операциялар жүргүзүү сыяктуу жергиликтүү адамдардан жеткириле турган кызматтары үчүн да төлөм алышат.
Иштин натыйжасы жакшы болсо, жалпы киреше айына 100 миң сомго чейин жетиши мүмкүн.
Азыркы учурда долбоордо мамлекеттик мекемени түзүүнүн жобосу тиешелүү бийлик органдарында макулдашылып жатат жана ишкана жаңы жылдан баштап толук ишке кирет.
Бир катар адистер ветеринардык кызматтарды жайылтуу жана аларга туруктуу айлык төлөмдөрдүн төлөнүшү чоң мааниге ээ экенин белгилешүүдө.
