Депутат Дастан Бекешев тарабынан демилгеленген жаңы мыйзам долбооруна ылайык, курулуш компаниялары кесилген дарактардын ордуна беш дарак отургузуулары керек болот. Отургузулган өсүмдүктөрдү үч жыл бою кароо милдеттендирилет, ал эми аларды кайсы жерге отургузууну жергиликтүү бийлик органдары аныктайт.
Мыйзам долбоорунда жергиликтүү бийлик органдарына эки жылдын ичинде бардык дарактарды инвентаризациялоо жана алардын электрондук базасын түзүү милдети жүктөлөт. Ошондой эле, ар бир жаранга кеминде 14 чарчы метр жашыл аймак камсыз кылуу сунушталууда.
Советтик мезгилде бир адамга 22 чарчы метр жашыл аймак туура келчү. Тилекке каршы, азыр биз мындай көрсөткүчкө жете албай турабыз. Кеминде 14 чарчы метрге жетүү жакшы болот. Жашылдандыруу жерде гана эмес, имараттардын чатырында да болушу керек.
Депутат Мирлан Жээнчороев бул демилгени колдоп, Бишкек шаарындагы жашыл зоналардын азайып жаткандыгына көңүл бурду. Анын маалыматы боюнча, Ататүрк атындагы парктын аянты 110 гектардан 50 гектарга чейин, ал эми Карагач токоюнун аянты 120–130 гектардан 70 гектарга чейин кыскарган.
Жашыл аймактардын көрсөткүчтөрү
«Бишкекзеленстрой» муниципалдык ишканасынын маалыматы боюнча, учурда борбор шаардын бир тургунуна болжол менен 6 чарчы метр жашыл аймак туура келет. Министрлер Кабинети мыйзам долбоорун жалпысынан колдоду, ал эми Жогорку Кеңештин комитети аны биринчи окууда жактырды.
