Экономика жана коммерция министрлигине караштуу Монополияга каршы жөнгө салуу кызматынын өкүлдөрү радио эфирде сүйлөп жатып, күйүүчү-майлоочу материалдардын баасы көтөрүлгөнү товарлардын баасын дароо жогорулатууга себеп болбошу керектигин айтышты. Алар буга негиз катары аймактарда өнүмдөрдүн жетиштүү запасы бар экенин белгилешти.

Жаратылыш монополияларын жана доминанттык структуралардын рынокторун жөнгө салуу бөлүмүнүн башчысы Лариса Шустикова азыркы учурда керектөөчүлөр үчүн күйүүчү майдын физикалык жеткиликтүүлүгү эң маанилүү экенин баса белгиледи.

Баалар бизде эле эмес, бүткүл дүйнөдө өсүп жатат. Эгер мамлекет кабыл алып жаткан чаралар болбогондо, биз бензиндин литрин 100 сомдон алда канча жогору, ал эми дизель майын андан да кымбат баада көрмөкпүз.
Лариса Шустикова

Ал мамлекет кыска мөөнөттүү гана эмес, узак мөөнөттүү чараларды да ишке ашырып жатканын кошумчалады.

Жакынкы аралыкта — 1-2 айдан кийин, же андан да эрте биз таптакыр башка сапаттагы күйүүчү май алабыз.
Лариса Шустикова

Мындан тышкары, ата мекендик заводдордо кайра иштетүү үчүн мунай жеткирүү, Кыргыз-Кытай-Өзбек темир жолун куруу, ошондой эле КММнын чоң запастарын түзүү үчүн мунай сактоочу жайларды куруу маселелери каралып жатканы белгиленди.

Күйүүчү майдын баасы товарлардын баасына кандай таасир этээри тууралуу айтып жатып, Шустикова ташуу чыгымдары ташылып жаткан продукциянын жалпы көлөмүнө бөлүштүрүлөрүн белгиледи.