Бишкек шаарындагы президенттин иш башкармалыгынын Клиникалык ооруканасына жакынкы жылдары заманбап 12 кабаттуу медициналык корпус курулат. Бул тууралуу министрлер кабинетинин төрагасы Адылбек Касымалиев «Ала-Арча» мамлекеттик резиденциясында мекеменин 80 жылдыгына арналган иш-чарада билдирди.
Анын айтымында, учурда жаңы корпустун долбоорунун техникалык-экономикалык негиздемеси иштелип чыгууда.
Касымалиев 2021-жылдан бери клиникалык оорукананын материалдык-техникалык базасын жаңылоо жана аны заманбап медициналык жабдуулар менен камсыздоо боюнча иштер жүргүзүлүп жатканын белгиледи.
Ошондой эле ал оорукананын хирургия бөлүмүндө жыл сайын 800дөн ашык операция жасаларын баса белгилеп, татаал жана жогорку технологиялуу хирургиялык кийлигишүүлөрдү аткарган дарыгерлердин эмгегин жогору баалады.
Министрлер кабинетинин төрагасы клиникалык оорукананын 80 жылдык тарыхы бир нече муундагы дарыгерлердин эмгеги менен байланыштуу экенин кошумчалап, жамаатты маараке менен куттуктады.
Касымалиев оорукананын жамаатын жана ардагерлерин юбилей менен куттуктап, 80 жыл ичинде бул жерде кесиптик мектеп калыптанып, медицинанын жаңы багыттары өнүгүп, дарылоонун заманбап ыкмалары киргизилгенин айтты.
Мисал катары ал бейтаптын боорунан болжол менен 5 кг салмактагы шишикти алып салуу операциясын келтирди.
2021-жылдан бери ооруканада материалдык-техникалык базаны жаңылоо иштери жүрүп, бөлүмдөр диагностикалык жана дарылоочу жабдуулар менен камсыздалууда.














