2026-жылдын 28-октябрында Эмгек, социалдык камсыздоо жана миграция министрлигинде аккредитация боюнча комиссиянын жыйыны өттү. Жыйынга Аида Исатбек кызы төрагалык кылды, ага тиешелүү мамлекеттик органдардын өкүлдөрү катышты.
Комиссия буга чейин эки мекеменин ишин көчмө баалоо иш-чарасын өткөргөн: Краснореченск атайын жалпы билим берүү (жардамчы) мектеп-интернаты жана К. Тилебаев атындагы Панфилов жетим жана ата-энесинин камкордугусуз калган балдар үчүн мектеп-интернаты.
Адистер текшерүү учурунда мекемелердин ишин, балдардын жашоо шарттарын, багуу жана тейлөө сапатын, ошондой эле көрсөтүлүп жаткан кызматтардын белгиленген талаптарга жана стандарттарга шайкештигин баалашты.
Жыйындын алкагында комиссия мекемелердин аккредитациядан өтүү арыздарын жана эксперттик топтордун текшерүүлөрдүн жыйынтыктары боюнча корутундуларын карап чыкты.
Берилген материалдарды карап чыккандан кийин комиссия эки мекеменин тең аккредитация талаптарына жооп берерин чечип, аларга тиешелүү күбөлүктөрдү берүү тууралуу чечим кабыл алды.
Балдар мекемелерин аккредитациялоо көрсөтүлүп жаткан кызматтардын сапатын жогорулатууга, балдардын укуктарын жана мыйзамдуу кызыкчылыктарын коргоого, ошондой эле алардын жашоосу, тарбияланышы жана өнүгүшү үчүн ылайыктуу шарттарды түзүүгө багытталган.
