Кыргызстандык Мээрим Жуманазарова Казакстандын Астана шаарында өтүп жаткан күрөш боюнча дүйнө чемпионатынын финалына чыкты. Бул тууралуу күрөш федерациясы билдирди.
Жуманазарова аялдар күрөшү боюнча 68 килограммга чейинки салмакта күч сынашып, алтын медаль үчүн күрөшөт. Финалда анын атаандашы Кытайдын өкүлү Цзя Лун болот.
Финалга чейинки жол
Мелдеш учурунда Жуманазарова үч ирет жеңишке жетти. 1/8 финалда ал Индиянын өкүлү Сриштини 5:1 эсебинде утту.
Чейрек финалда америкалык Алексис Блейдс менен беттешип, атаандашын мөөнөтүнөн мурда, туше ыкмасы менен жеңди.
Жарым финалда Жуманазарова Монголиянын өкүлү Делгермаа Энхсайханды 5:1 эсебинде утуп, финалга жолдомо алды.
Тарыхый жетишкендик
Жуманазарова Кыргызстандын азыркы дүйнө чемпионатында финалга чыккан биринчи өкүлү болду. Буга чейин грек-рим күрөшү боюнча кыргызстандык балбандар эки коло медаль тагынышкан.
