Екатеринбург шаарында Wildberries логистикалык борборуна жакын жердеги унаа токтотуучу жайда учкучсуз учактардын чабуулунан кийин өрт чыккан. Свердлов облусунун губернатору Денис Паслердин маалыматына ылайык, окуядан кийин адамдар эвакуацияланып, жабыркагандар болгон жок.
25-июль күнү эртең менен жергиликтүү E1.ru басылмасы Wildberries кампасынын аймагынан чыккан коюу түтүндүн сүрөттөрү менен видеолорун жарыялаган. Компания коопсуздук талаптарына ылайык, объектиде алдын ала пландуу эвакуация жүргүзүлгөнүн билдирди.
Кийинчерээк Денис Паслер учкучсуз учактардын чабуулун тастыктап, анын сыныктарынын кулашынан Екатеринбургдун Чкалов районундагы унаа токтотуучу жайда өрт чыкканын айтты. Өрт өчүрүлүп, инфраструктуралык жана экономикалык объекттер жабыркаган жок, жабыркагандар жок экенин губернатор билдирди.
Wildberries компаниясы логистикалык комплекстин өзү жабыркабаганын, бирок кампанын иши убактылуу токтотулганын маалымдады.
Мурунку чабуулдар
Буга чейин украиналык Exilenova+ Telegram каналы чабуулдун максаты Wildberries кампасы болгон деп ырастаган. Анда жарыяланган кадрларда логистикалык борборуна жакын жерде өрт чыкканы көрүнүп турат, болжол менен токтоп турган унаалар күйгөн.
Маалымат каражаттарынын айтымында, 18-июлдан бери Москва облусундагы, Тамбов облусундагы, Краснодардагы, Ставрополь крайындагы, Ленинград облусундагы, Санкт-Петербургдогу, Воронеждеги жана аннексияланган Крымдагы Wildberries логистикалык борборлору менен кампалары учкучсуз учактардын чабуулуна кабылган.
