Санкт-Петербург жана Ленинград облусунда жайгашкан Wildberries компаниясынын кампаларында Украинадан келген учкучсуз аппараттардын кол салуусунан кийин өрт чыккандыгы тууралуу маалымат тарады. Чет элдик маалымат каражаттарынын билдирүүсүнө ылайык, окуянын кесепетинен үч адам жабыркаган.
Орусия бийлигинин маалыматы боюнча, өрт Ленинград облусунун Всеволожск районундагы Новосаратовка айылында жайгашкан кампалардын биринде башталган. Губернатор Александр Дрозденконун айтымында, үч адам жабыркап, ооруканага жаткырылган.
Wildberries компаниясынын басма сөз кызматы болсо, Санкт-Петербург жана Ленинград облусундагы кызматкерлер арасында жабыркагандар жок экенин билдирди. Маркетплейстин маалыматына ылайык, адамдар алдын ала эвакуацияланып, коопсуз жайга чыгарылган. Компания ошондой эле Шушары жана "Уткина Заводь" өнөр жай аймагындагы логистикалык объектилердеги өрттөр тууралуу кабарлап, кампалардын иши убактылуу токтотулганын маалымдады.
Мындан тышкары, маалымат каражаттары учкучсуз аппараттын соккусунан Синявино айылындагы "Северная" канаттуулар фабрикасынын кампасынын бир бөлүгү урап түшкөнүн жазышты. Акыркы маалыматтарга караганда, аймактын үстүнөн 50 учкучсуз аппарат атып түшүрүлгөн.
