Кыргызстандын бокс федерациясынын президенти Кунай Медетхан Kaktus.media басылмасына берген маегинде 2027-жылга карата пландарын айтып берди. Анын айтымында, быйыл курама команда дүйнө чемпионаты сыяктуу маанилүү мелдештерге катышып, 2028-жылкы Лос-Анжелес Олимпиадасына жолдомо алууга аракет кылат.
Улуттук кураманын курамын аныктоо үчүн өлкө чемпионаты өткөрүлдү. Медетхандын айтымында, чемпионаттын жыйынтыгы боюнча федерациянын машыктыруучулар штабы курамды тандайт.
Биз деңгээлди карап чыктык: ал бир топ өстү. Көптөгөн салмак категорияларында атаандаштык бар. Балдар даярдыгы жакшыраак экени көрүнүп турат. Ошондуктан бизде жакшы үмүттөр бар.
Медетхан өлкө чемпионатында биринчи жолу электрондук добуш берүү системасы колдонулганын белгиледи. Бул системанын аркасында көрүүчүлөр, калыстар жана машыктыруучулар ар бир раунддагы калыстардын баасын дароо көрө алышат. Мындай ыкма машыктыруучуларга спортчулардын кайсы аракеттери кандай бааланып жатканын тактикалык жактан түшүнүүгө жардам берет.
Мындан тышкары, калыстыктын акыйкаттуулугун камсыздоо жана эл аралык аренадагы кадыр-баркты көтөрүү максатында чемпионатка беш эл аралык категориядагы калыс чакырылды. Федерация чемпионаттын деңгээлин мындан ары да жогорулатууну көздөйт.
Ошондой эле федерация окуу-машыгуу жыйындарына курамды кеңейтүүнү пландаштырууда. Бул кадам команда ичиндеги атаандаштыкты күчөтүүгө жана жаш спортчуларга мүмкүнчүлүк берүүгө багытталган. Кунай Медетхандын айтымында, мындай чаралар келечекте олимпиадалык лицензияларды алуу мүмкүнчүлүгүн жогорулатат.
