Бишкек шаарында 2026-жылдын 29-31-октябрында Борбордук Азия медициналык форуму жана Борбордук Азия респиратордук коомунун I конгресси өтөт. Бул тууралуу профессор Талант Сооронбаев билдирди. Иш-чаралар «Респиратордук жана жугуштуу эмес ооруларды башкаруунун интеграцияланган моделдери: глобалдык чакырыктар жана чечимдер» деген жалпы теманын алдында өтөт.
Форумдун катышуучулары дем алуу органдарынын ооруларын, жүрөк-кан тамыр жана башка жугуштуу эмес ооруларды диагностикалоо жана дарылоонун заманбап ыкмаларын, ошондой эле климаттын өзгөрүшүнүн жана абанын булганышынын адамдын ден соолугуна тийгизген таасирин талкуулашат. Күн тартибинде жасалма интеллекттин медицинадагы колдонулушу дагы бар.
31 өлкөдөн келген эксперттер тажрыйба алмашат
Форумга Борбордук Азия өлкөлөрүнөн, Россиядан, Европа Биримдигинин өлкөлөрүнөн, АКШдан, Кытайдан, Улуу Британиядан, Түштүк Африкадан, Сауд Арабиясынан жана Бириккен Араб Эмирликтеринен алдыңкы дарыгерлер, окумуштуулар жана эксперттер катышат деп күтүлүүдө. Бул иш-чара эл аралык илимий билим жана практикалык тажрыйба алмашуу, заманбап медициналык технологияларды талкуулоо, биргелешкен билим берүү жана изилдөө программаларын өнүктүрүү үчүн аянтча болуп калат.
Дем алуу органдарынын оорулары — негизги чакырык
Дем алуу органдарынын оорулары Борбордук Азияда маанилүү медициналык жана социалдык көйгөй бойдон калууда. Алар эмгекке жарамдуулукту жоготууга, майыптыкка жана эрте өлүмгө алып келет. Бул тууралуу Lung Facts, IRC 2024-жылдагы эл аралык изилдөөлөрдүн маалыматтары күбөлөндүрөт.
Кыргызстанда дагы абал жагымсыз бойдон калууда. Форумдун уюштуруучуларынын маалыматы боюнча, акыркы жылдары оорулардын өсүү тенденциясы байкалууда.
