Социалдык тармактарда Бишкектин Октябрь районундагы жер астындагы өткөөлдөрдүн биринде жарандар дубалдарды буттары менен тебип жаткан видео пайда болду. Кадрларда адамдардын өткөөлдүн ичиндеги дубалдарды атайылап тепкилеп жатканы көрүнөт.
Октябрь районунун акимиаты бул окуяга байланыштуу билдирүү таратып, бардык аракеттер көзөмөл камералары аркылуу жазылып жатканын эскертти. Акимиаттын маалыматы боюнча, коомдук мүлккө зыян келтирген адамдарга административдик жоопкерчилик каралган.
Камералардын баары жазып жатат, коомдук мүлккө зыян келтиргендерге айып пул салынат.
Адистер жарандарды шаардык инфраструктурага этият мамиле кылууга чакырып, мындай аракеттердин кесепети шаардык бюджетке оор жүк болорун белгилешти. Буга чейин да шаардык мүлктү бузуу фактылары катталып, айыпкерлер аныкталган учурлар болгон.
Учурда видео кайсы өткөөлдө тартылганы такталып, айыпкерлердин өздүгүн аныктоо боюнча иштер жүрүп жатат. Акимиат жарандарды мындай укук бузууларга жол бербөөгө жана бузуу фактыларын тиешелүү органдарга билдирүүгө үндөдү.
