11-июлда Бишкек шаарынын мэри Айбек Джунушалиев шаардын бир нече жол участкаларында жүрүп, курулуш жана реконструкция иштеринин өнүгүшүн көзөмөлдөдү. Бул тууралуу баш калаа мэриясынын басма сөз кызматы билдирди.
Иш сапардын алгачында ал Дүйшөев көчөсүнүн Чыңгыз Айтматов проспектисинен Байтик Баатыр көчөсүнө чейинки 1,1 чакырымдык жаңы жол жана көпүрө куруу участогуна барды. Бул жол эки маанилүү шаардык магистральды бириктирет.
Андан кийин мэр төмөнкү жолдорду текшерди: Муромская көчөсү Алыкулов көчөсүнөн Ахунбаев көчөсүнө чейин; Сухэ-Батора көчөсү 7-Апрель көчөсүнөн Чыгыш айлана жолуна чейин; Ауэзов көчөсү Салиева көчөсүнөн Жибек Жолу проспектисине чейин.
Жол курууда инженердик түйүндөрдүн жана канализациянын курулушу, жол иштеринин сапаты, сырткы жарыктандыруу жана курулуш аймагында жайгашкан объектилердин абалына өзгөчө көңүл бөлүндү.
Айбек Джунушалиев аймактык кызматтарга жана подрядчиктерге курулуш иштерин ыкчамдатуу, сапатты ишенимдүү камсыздоо жана бардык долбоорлордун мөөнөттөрүн так сактоо боюнча тапшырмалар берди.
