Министрлер кабинетинин басма сөз кызматы билдиргендей, Адылбек Касымалиев Ош шаарындагы бир нече маанилүү объектилерди кыдырып, курулуш иштеринин жүрүшү менен жеринен таанышты.
«Ош Сити» долбоору: 17 200 батир жана 15 миң жумуш орду
Алгач Касымалиев «Ош Сити» (IT-шаарча) долбооруна барды. 71 гектар аянтта 17 200 батир, үч мектеп, эки бала бакча, оорукана жана IT-хаб курулууда. Долбоордун алкагында 15 миң жумуш ордун түзүү пландалууда.
«Ош Сити» долбоорунун көрсөткүчтөрү
Б. Осмонов көчөсү: алты тилкеге чейин кеңейтет
Андан соң өкмөт башчысы Б. Осмонов көчөсүнүн капиталдык оңдоп-түзөө иштери менен таанышты. Узундугу 5 чакырым болгон жол алты тилкеге чейин кеңейтилип, реконструкцияланууда. Тротуарларды жана тогуз автобус аялдамасын жабдууну кошкондо, иштерди жыл аягына чейин бүтүрүү пландалууда.
Таштанды кайра иштетүүчү завод: күнүнө 1000 тоннага чейин
Касымалиев ошондой эле таштанды кайра иштетүү жана электр энергиясын өндүрүү заводунун долбоору менен таанышты. Долбоордун баасы 95 миллион АКШ долларын түзөт. Ишкананын кубаттуулугу күнүнө 800дөн 1000 тоннага чейин таштанды иштете алат.
Ак-Буура дарыясын тазалоо: 63 253 куб метр сел калдыктарын чыгаруу
Андан кийин өкмөт башчысы Ак-Буура дарыясын тазалоо жана көрктөндүрүү иштеринин экинчи этабы менен таанышты. Шаар аймагынан өткөн дарыянын 17 чакырымдык бөлүгү тазалоо иштери үчүн төрт участокко бөлүнгөн. Экинчи этапты ишке ашырууга 24 миллион сом бөлүнгөн. 63 253 куб метр сел калдыктарын, кум жана шагылды чыгаруу каралган.
«Коңур-Жаз» агрокомплекси: 10 миң баш малга ылайыкталган
Ошондой эле Касымалиев «Коңур-Жаз» агроөнөр жай комплексине барды. Долбоорго ылайык, аянты 69,76 гектар болгон комплекс 10 миң баш мал багууга ылайыкталган.
