Мамлекеттик маданият, маалымат жана жаштар саясаты министрлигинин басма сөз кызматынын билдирүүсүнө таянсак, «Кыргызсериал» мамлекеттик мекемеси 2027-жылга карата көркөм сериалдардын сценарийлерине конкурс жарыялады. Катышуучулар өтүнмөлөрдү 2026-жылдын 25-декабрына чейин тапшыра алышат.
Конкурс сапаттуу сериалдык долбоорлорду түзүүгө багытталган. Алар кыргыз элинин тарыхына, көрүнүктүү инсандарга, улуттук баалуулуктарга, тарбиялоого жана руханий өнүгүүгө арналган болушу керек. Ошондой эле, заманбап коомдун актуалдуу көйгөйлөрү жана жетишкендиктерин чагылдырган сценарийлер да колдоого алынат.
Долбоордун багыттары
- Улуттук иденттүүлүк жана салттар
- Билим берүү жана агартуу
- Адеп-ахлактык тарбия
- Жаратылышты коргоо жана туризмди өнүктүрүү
- «Улуттук дух — дүйнөлүк бийиктиктер» мамлекеттик программасынын алкагындагы сериалдарды улантуу
Катышуу шарттары
Конкурска Кыргызстанда катталган жана аудиовизуалдык чыгармаларды чыгарууга укугу бар жеке киностудиялар жана продюсердик компаниялар катыша алышат. Ар бир катышуучу бир гана өтүнмө бере алат.
Тапшырылуучу документтердин тизмеси
- Долбоорду сунуштаган кат
- Сериалдын концепциясы
- Пилотдук сериянын толук сценарийи
- Эки-үч сүйлөмдөн турган логлайн
- Синопсис
- Автордук укуктарды жана долбоорду берүүгө ыйгарым укуктуулукту тастыктаган документтер
Сценарийлер мамлекеттик тилде жазылышы керек. Алар Times New Roman шрифти менен, 14 өлчөмүндө жана бир иреттик интервал менен тартиптелүүгө тийиш.
