Укук коргоочу Гүлшайыр Абдирасулова президенттин аймактардын тургундары менен болгон жолугушууларын кунт коюп көзөмөлдөп жүрөт. Ал өзүнүн социалдык тармактагы баракчасына жазгандай, уккандары аны таң калтырды.
Абдирасулова өзү көптү көргөнүн, көптөгөн адамдарга жардам бергенин, бирок кыйноолордун, опузалап акча талап кылуунун жана адилетсиздиктин мындай масштабы аны да таң калтырганын белгиледи.
Системаны түп-тамырынан бери өзгөртүү керек
Юристтин пикиринде, президент жеке кабыл алуусунда уккан арыздарды чечүүгө аракет кылып жатканы менен, мындай мамиле системаны оңдой албайт. Сот адилеттүүлүгү — укук коргоо органдары, прокуратура жана соттор бирдиктүү чынжыр. Эгерде бир звеносу бузуу менен иштесе, бүт система жабыркайт.
Абдирасулова адилеттүүлүккө болгон укук президенттин жеке кабыл алуусуна көз каранды болбошу керектигин, антпесе «соттор жана прокуратура эмнеге керек?» деген суроо жараларын кошумчалады.
