Учурда Борбордук Азиянын Бириккен энергетикалык системасынын негизги электр берүү линиялары пландык көрсөткүчтөрдөн гана эмес, уруксат берилген чектен да ашып, толук кубаттуулукта иштеп жатат. Бул тууралуу Евразия өнүктүрүү банкынын тармактык талдоо борборунун улук аналитиги Демир Кабылбаев 29-октябрда "Чексиз энергия: Борбордук Азиянын энергетикалык байланышынын архитектурасы" аттуу баяндамасын тааныштыруу учурунда билдирди.
Адистин айтымында, кыска мөөнөттүү келечекте мындай абал коркунучтуу эмес. Бирок өлкөлөр электр энергиясынын соодасын көбөйтүүнү каалашса, бул фактор мүмкүнчүлүктөрдү чектей баштайт. Өткөрүү кубаттуулугунун жетишсиздиги сооданы гана эмес, авариялык учурлардагы колдоону да чектейт.
Туруктуулукту жогорулатуу үчүн жаңы тармактык долбоорлор зарыл. Алар жеткиликтүү өткөрүү кубаттуулугун арттырып, тармактардын ашыкча жүктөлүшүн азайтып, жалпы ишенимдүүлүктү жогорулата алат.
ЕАБРдин маалыматы боюнча, Борбордук Азиянын электр энергиясынын аймактык соода системасы калыбына келүүдө. Ал 2010-жылдагы тарыхый минимумга (2,5 млрд кВт/с) салыштырмалуу беш эсе өсүп, 2024-жылдын жыйынтыгында 12,1 млрд кВт/ска жетти. Бирок өз ара электр энергиясынын соодасынын жалпы керектөөдөгү үлүшү Европа Биримдигиндеги, Германиядагы жана Финляндиядагы деңгээлден 2–2,5 эсе төмөн.
Электр энергиясынын соодасынын динамикасы
Сооданын темпин арттыруудагы негизги көйгөйлөрдүн бири — кубаттуулуктардын жетишсиздиги. ЕАБРдин эксперттери мисал катары бүткүл Борбордук Азиянын Бириккен системасы максималдуу мааниде иштеген жылдык эң жогорку керектөө учурун келтиришет. Ал 10-декабрда катталган.
