Америкалык аскерлер АКШ президенти Дональд Трамптын Флоридадагы Мар-а-Лаго резиденциясынын жанына зениттик ракеталык комплекстерди жайгаштырышты. Бул тууралуу The War Zone басылмасы АКШ куралдуу күчтөрүнүн өкүлдөрүнө шилтеме берип кабарлады.
Маалыматка ылайык, AN/TWQ-1 Avenger мобилдик зениттик ракеталык комплекстери эки жумадай мурун, президенттин коопсуздугуна байланыштуу тынчсыздануулар күчөгөн маалда жайгаштырылган.
ПВО системалары Палм-Бичтеги Мар-а-Лаго аймагына, ошондой эле резиденциядан болжол менен беш чакырым алыстыкта жайгашкан Дональд Трамп атындагы эл аралык аэропорттун жанына коюлган.
Жарыяланган сүрөттөрдө резиденциянын жанындагы сүзүүчү платформада эки Avenger комплекси, жээкте дагы бири көрүнөт. Аэропорттун аймагында да кеминде эки окшош комплекс орнотулган.
Техниканын жайгаштырылышын Түндүк Американын аэрокосмостук коргонуу бириккен командачылыгы (NORAD) жана АКШ куралдуу күчтөрүнүн Түндүк командачылыгы (USNORTHCOM) ырасташты.
Командачылыктардын өкүлдөрүнүн айтымында, ПВО системалары жана учкучсуз аппараттарга каршы каражаттар президентти коргоого жооптуу АКШ жашыруун кызматынын өтүнүчү боюнча орнотулган.
Бул каражаттар коргоонун кошумча деңгээлин камсыз кылат. Операциялык коопсуздук жагдайына байланыштуу биз кошумча маалымат бере албайбыз.
Жашыруун кызмат коркунучтун жогорулатылган деңгээлинде иштеп жатканын жана корголуучу адамдарды коргоо чараларын дайыма өркүндөтүп жатканын белгиледи.
Эмне үчүн Трамптын коопсуздугу күчөтүлдү?
Комплекстерди жайгаштыруунун расмий себеби ачык айтылган жок. Бирок америкалык аскерлер бул кадам президенттин коопсуздугуна байланыштуу тынчсыздануулардын күчөшүнөн улам жасалганын билдиришти.
