Талас районунун Жон-Арык айылында төрөлүп-өскөн Канчайым апа бүт өмүрүн ушул жерде өткөргөн. Ал өзүнүн айылында турмушка чыгып, жубайы Базарбаев Казакбай экөө 14 баланы тарбиялап өстүрүшкөн.
Канчайым апанын айтымында, экөө алты уул, сегиз кызды тарбиялап, баарын үйлөнтүп, турмушка узатып, өз үйлөрү менен камсыздашкан. Бүгүнкү күндө ар бири өз үй-бүлөсү менен өз алдынча жашап жатышат.
Канчайым апанын тукуму
Канчайым апа 72 небере, 122 чөбөрө жана 8 кыбыранын башын кошуп, алардын арасында урмат-сый менен жашап жатканы үчүн Кудайга ыраазычылык билдирет. Кээде баарын санап отуруп, канчалаган балдар, неберелер жана чөбөрөлөр чоңоюп, өз алдынча жашоо куруп кеткенине таң калат.
Анын айтымында, эне үчүн балдарынын жана тукумунун бакубат жашоосун көрүүдөн артык бакыт жок. Ал ушул куракта да балдарын колунан жетелеп жүргөн күндөрү кечээ эле болгондой эсте калганын айтат.
Канчайым апанын эки кызы да «Баатыр эне» наамына ээ болушкан. Ал кыздарынын да көп балалуу эне болуп, мындай ардактуу наамга татыганына сүйүнөт. Өзү көп бала тарбиялап, аларды бутка тургузуу канчалык эмгекти талап кыларын жакшы билгендиктен, кыздарынын бул жетишкендиги аны өзгөчө кубандырат.
