2025-жылы Кыргызстандагы чакан жана орто курулуш ишканаларынын финансылык көрсөткүчтөрү кескин жакшырды. Улуттук статистика комитети жарыялаган «Кыргыз Республикасындагы чакан жана орто ишкердик 2021–2025-жылдары» жыйнагында белгиленгендей, тармактын жалпы сальдолонгон финансылык натыйжасы өткөн жылга салыштырмалуу 13 эсеге өскөн.
Бул көрсөткүч каралып жаткан экономикалык ишмердүүлүк түрлөрүнүн ичинен эң жогорку өсүш катары бааланды. Жалпысынан чакан жана орто ишканалар 2025-жылды 140,8 миллиард сомдук оң сальдолонгон финансылык натыйжа менен аякташты, бул акыркы беш жылдагы эң мыкты көрсөткүч.
Курулуш иштеринин көлөмү да өстү
Курулуш иштеринин көлөмү да бир эле учурда көбөйгөн. 2025-жылы чакан жана орто ишкердик субъекттери 263,3 миллиард сомдук подряддык иштерди аткарышты. Бул 2024-жылга салыштырмалуу 21,4 пайызга, ал эми 2021-жылга салыштырмалуу 2,3 эсеге көп.
Орто ишканалардын подряддык иштери бир жылда эки эсеге, чакан ишканалардыкы 1,5 эсеге өскөн. Ал эми жеке ишкерлердин көрсөткүчү, тескерисинче, 19 пайызга төмөндөгөн.
Инвестициялык активдүүлүк жанданды
Инвестициялык ишмердүүлүктө да өсүш байкалды. Улуттук статистика комитетинин маалыматы боюнча, 2025-жылы чакан жана орто ишканалар негизги капиталга 149,6 миллиард сом инвестиция өздөштүрүштү, бул мурунку жылга караганда 22,8 пайызга көп.
Инвестициялоонун артыкчылыктуу багыттарынын бири турак жай курулушу бойдон кала берди.
2025-жылдын негизги көрсөткүчтөрү
