Талас облусунда 2026-жылдын алгачкы алты айынын социалдык-экономикалык өнүгүүсүнүн жыйынтыгы чыгарылды. Коллегиялык жыйын президенттин аймактагы ыйгарым укуктуу өкүлү Эрмат Жумаевдин жетекчилиги астында өттү.
Биринчи жарым жылдыктын жыйынтыгы боюнча облуста экономикалык көрсөткүчтөрдүн өсүшү, инвестиция тартуу, курулуш, жол инфраструктурасы, айыл чарбасы жана социалдык тармакта оң динамика байкалууда.
Учурда Талас облусунда 68 объектте курулуш иштери активдүү жүрүп, бир катар ири инфраструктуралык долбоорлор ишке ашырылууда.
Аймак ошондой эле 55 өлкө менен соода-экономикалык байланыштарды активдүү колдоого алат.
Жол инфраструктурасына өзгөчө көңүл буруу
Жыйында жолдордун абалына өзгөчө көңүл бурулду. Президент Садыр Жапаровдун турукташтыруу фондунун колдоосу менен Талас облусунда планга кирбеген 28 чакырым жолду асфальттоо иштери жүрүп жатат.
Эрмат Жумаев жергиликтүү жетекчилердин жоопкерчилигин күчөтүүнү, ошондой эле башталган долбоорлордун сапаттуу жана өз убагында аягына чыгарылышын камсыздоонун зарылдыгын баса белгиледи.
Буга чейин Кыргызстандын эгемендүүлүгүнүн 35 жылдыгына арналган негизги салтанаттар 11-12-сентябрда Таласта өтөрү белгилүү болгон. Министрлер кабинетинин башчысы Адылбек Касымалиев июль айында облуска барып, иштердин аткарылышын текшерип, социалдык объектилер өлкөнүн Эгемендүүлүк күнүнө карата ачыларын билдирген.
