АКШнын Мичиган штатында циклоспориаз аттуу ичеги инфекциясы катталган учурлардын саны кескин көбөйдү. Азыркыга чейин расмий түрдө 3 309 учур катталды, ал эми 44 адам ооруканага жаткырылган.
Мичиганда кадимки жылдарда бул оору боюнча болжол менен 40-50 гана учур катталат. Ошондой эле Огайо штатында да 360тан ашуун адам бул инфекция менен ооруп, ал тургай бир нече киши ооруканага түшкөн.
Мичигандагы саламаттык сактоо департаментинин алдын ала иликтөөлөрү боюнча, инфекциянын булагы катары жалбырактуу жашылчалар — салат-латук болушу мүмкүн. Бирок азырынча кайсы бир конкреттүү азык-түлүк же өндүрүүчү аныктала элек.
Циклоспориазды бир клеткалуу паразит Cyclospora cayetanensis козгойт. Бул инфекция көбүнчө булганган тамак-аш же суу аркылуу кабыл алынат. Негизги белгилери болуп суюк диарея, ичтин кыжыры жана чарчоо эсептелет. Симптомдор адатта инфекциядан кийин бир жуманын ичинде чыга баштайт.
АКШнын Ооруларды көзөмөлдөө жана алдын алуу борбору (CDC) 9-июлга карата 31 штатта циклоспориаздын учурлары катталганын билдирген. Бирок чындыгында ооругандар мындан көп болушу мүмкүн, анткени баары токтоосуз медициналык жардамга кайрылбайт же анализ тапшырышпайт.
Дарыгерлер симптомдор байкалганда дароо медициналык жардамга кайрылууну сунуш кылып, булганган азыктардан сактанууну эскертүүдө.
