Бүгүн, 24-июлда Кыргызстандын президенти Садыр Жапаров Ысык-Көл облусунун Чолпон-Ата шаарында Шанхай кызматташтык уюмуна (ШКУ) мүчө өлкөлөрдүн тышкы иштер министрлерин кабыл алды. Жолугушууда коопсуздук, соода, транспорт жана инвестиция тармактарындагы кызматташтыкты бекемдөө, ошондой эле Бишкекте өтүүчү ШКУ саммитин ийгиликтүү уюштуруу маселелери талкууланды.
Садыр Жапаров ШКУнун түзүлгөндүгүнүн 25 жылдык мааракесине туш келген Кыргызстандын төрагалыгын өзгөчө белгилеп, уюмду тең укуктуу диалог жана чечимдерди биргелешип издөө үчүн маанилүү аянтча катары баса белгиледи.
Мамлекет башчысы өз сөзүндө терроризм, экстремизм, баңгизаттарды мыйзамсыз жүгүртүү жана трансулуттук уюшкан кылмыштуулук жаңы шарттарга тез ыңгайлашып жатканын айтты. Ошондуктан коопсуздук бүгүнкү күндө саясий, экономикалык, технологиялык, экологиялык жана гуманитардык өлчөмгө ээ экенин белгиледи.
Президент Жапаров Регионалдык антитеррордук структуранын (РАТС) базасында коопсуздук чакырыктарына жана коркунучтарына каршы туруу үчүн универсалдуу борборду, анын ичинде Бишкектеги трансулуттук уюшкан кылмыштуулукка каршы күрөшүү борборун тездетип түзүүгө чакырды. Ал муну Кыргызстандын аймактагы тынчтыкты жана коопсуздукту камсыз кылууга кошкон маанилүү салымы деп атады.
Ошондой эле, мамлекет башчысы ШКУга мүчө өлкөлөрдүн тышкы иштер министрлери саясий өз ара аракеттенүү, коопсуздук жана практикалык экономикалык кызматташтыктын негизги маселелерин талкуулап, Бишкектеги Мамлекет башчыларынын Кеңешинин жыйынын ийгиликтүү өткөрүү үчүн зарыл негизди түзөт деген ишенимин билдирди.
Россиянын тышкы иштер министри Сергей Лавров Кыргызстандын ШКУдагы төрагалыгынын маанилүүлүгүн жана өлкө тарабынан белгиленген биргелешкен иштин артыкчылыктарын белгиледи.
Бишкек саммитинин жыйынтыгында уюмду өнүктүрүүнүн так багыттары аныкталышы керектиги баса белгиленди.
Азырынча комментарий жок. Биринчи болуңуз!
Жакшыраак сунуштарды алуу үчүн кириңиз
