Президент Садыр Жапаров Чүй облусуна болгон иш жүргүзүү сапарынын алкагында Кант шаарынын жана Ысык-Ата районунун тургундары менен жолугушууда жер маселесин көтөрдү. Ал 2020-жылы жер сатып алган 20 үй-бүлөнүн укугуна байланыштуу чыккан талаш-тартышты териштирүү керектигин белгиледи.
Жолугушууда Нури Токтомушев аттуу жаран Президентке кайрылып, аталган маселени баяндап берди. Анын айтымында, 2020-жылы 20 үй-бүлө Ырыскул аттуу аялдан жер тилкелерин сатып алышкан. Жер амнистиясынын алкагында алар жети айлык кайрылуулардан кийин жеке менчик укугу жөнүндө мамлекеттик актыларды («кызыл китептерди») алууга жетишкен.
Бирок андан кийин Жер ресурстары, кадастр, геодезия жана картография мамлекеттик агенттиги бул жер тилкелерине чектөө коюп койгон. Арыз ээсинин билдирүүсүнө караганда, бул көйгөй бир жылдан бери чечилбей келет. Сот процесстери да маселени акыркы чечимге алып келген эмес.
Соттук кароолордун жыйынтыгы боюнча райондук сот үй-бүлөлөрдүн пайдасына чечим чыгарган, бирок Чүй облустук соту аны жокко чыгарган. Кийинчерээк бул чечимди Жогорку сот да жокко чыгарган.
Эмне үчүн мындай болду? Эгерде биринчи сот алардын пайдасына чечим чыгарган болсо, эмне үчүн аны жокко чыгарышты? Жакшы, бул маселени карап чыгабыз.
Президент сот системасынын өкүлдөрүнөн райондук соттун чечими кандай негиз менен жокко чыгарылганын тактоону суранып, кырдаалды териштирүү тапшырмасын берди.
