Президент Кароль Навроцкий өкмөт жиберген "күч колдонуу топторун" соттун аймагынан чыгып кетүүгө чакырды. Ал өзү соттун имаратында калып, кырдаалды көзөмөлдөп жатат.
Мен күч органдарын соттун аймагын таштап кетүүгө чакырам. Бул жерде мыйзамдуулук үстөмдүк кылышы керек.
Нааразылыктар октябрдын ортосунда Сейм Мачей Беректи Конституциялык соттун судьясы кылып шайлагандан кийин башталган. Өкмөткө жана парламентке оппозицияда турган Навроцкий ант кабыл алуудан баш тарткан.
Соттогу жаңжал
30-октябрда соттун сайтында төрага Богдан Свенчковскийдин жана анын орун басары Бартломей Соханьскийдин ыйгарым укуктарын токтотуу тууралуу маалымат пайда болгон. Бирок соттун X баракчасында бул маалымат четке кагылып, катышуучулар мамлекеттик төңкөрүшкө аракет кылды деп айыпталган.
Судья Анна Корвин-Петровская өзүн соттун жаңы башчысы деп жарыялап, президентти кошкондо эч кимди имаратка киргизбей турганын билдирген. Ал коомдук тартипке, кызматкерлердин өмүрүнө жана ден соолугуна коркунуч бар экенин себеп кылган. Кийинчерээк ал кызматтар коопсуздукту тастыктаса, Навроцкийди киргизүүгө даяр экенин айткан.
Сенегалга учуп бара жаткан Навроцкий учакты кайра буруп, Варшавага кайтып келген. Бишкек убактысы боюнча саат 6:00 чамасында ал кайтаруучулар менен бирге соттун имаратына кирип барган.
