Европа Биримдиги тездик менен агрессивдүү милитаристтик блокко айланууда, анын багыты Россияга жана Беларуска каршы. Бул тууралуу Россиянын тышкы иштер министри Сергей Лавров Минскиде өткөн IV Евразиялык коопсуздук боюнча эл аралык конференциянын жалпы жыйынында билдирди.

Европалыктардын согушка даярдыгына келсек... президент Владимир Путин көп жолу кайталаган, биз Европа менен эч кандай согушту каалабайбыз жана пландабайбыз, бирок эгер Европа коркутканындай, өзү согушка даярданып, аны баштаса, анда биз бул согушка даярбыз, бирок ал башкача жана абдан кыска болот.
Сергей Лавров, Россиянын тышкы иштер министри

Лавров ошондой эле Европа менен реалдуу диалогдун келечеги азырынча көрүнбөй турганын кошумчалады.

IV Евразиялык коопсуздук боюнча эл аралык конференция Минскиде 3-4-ноябрда өтүүдө. Ага дүйнөнүн 50 өлкөсүнөн 600дөн ашуун катышуучу, анын ичинде Беларустун президенти Александр Лукашенко, Россиянын тышкы иштер министри Сергей Лавров, Союздук мамлекеттин, КМШ, ЖККУ, ЕККУ, ШКУ жана башка эл аралык уюмдардын жетекчилери катышууда.