Бир катар депутаттар «Кыргыз Республикасынын Жогорку соту жана жергиликтүү соттору жөнүндө» конституциялык мыйзамына жана жарандык сот иш алып барууну жөнгө салуучу ченемдерге өзгөртүүлөрдү киргизүүнү сунушташууда. Бул демилге соттук процесстердин ашыкча созулуп кетишин алдын алууга багытталган.
Учурда жарандык иштер арыз сотко түшкөн күндөн тартып үч айга чейин, ал эми экономикалык иштер эки айга чейин каралышы керек. Бирок иш жүзүндө бул мөөнөттөр көп учурда бузулуп келет.
Процесстердин кечигишинин негизги себептери катары соттук отурумдарды кайра-кайра жылдырып коюу, узак мөөнөттүү тыныгуулар жана техникалык мүмкүнчүлүктөрдүн жоктугунан улам видеобайланыш аркылуу катыша албаган тараптардын келбегендиги аталып өтүлөт. Натыйжада жарандар соттук чечимдерди айлар бою, кээде жылдар бою күтүп, адвокаттар үчүн кошумча чыгымдарды төлөөгө мажбур болушат.
Кандай өзгөртүүлөр сунушталууда?
Негизги жаңылыктардын бири — эмгек акыны өндүрүп алуу жана ден соолукка келтирилген зыянды калыбына келтирүү боюнча иштерди кароо мөөнөтүн кыскартуу. Мындай талаш-тартыштар арыз сот тарабынан өндүрүшкө кабыл алынган күндөн тартып бир айдын ичинде каралышы керек.








