Ички иштер министрлиги 2026-жылдын 8-октябрына чейин Кыргызстанга алып келинген мопеддерди, мотоциклдерди жана скутерлерди документсиз легалдаштыруу демилгесин көтөрдү. Бул техниканын ээлери үчүн каттоо мөөнөтү төрт ай деп белгиленип, айрым жеңилдиктер каралган.
Атап айтканда, А1 категориясындагы айдоочулук күбөлүк алуу үчүн окутуу мөөнөтү 30 күндөн бир күнгө чейин кыскартылат. Ошондой эле жеңилдетилген тарифтер киргизилет. Эгерде техниканын өлкөгө киргизилген датасы тууралуу документ жок болсо, анда 2026-жылдын 7-октябры киргизүү күнү катары эсептелет.
Бирок төрт айдын ичинде катталбаган техника соттун чечими менен утилдештирүүгө жөнөтүлүшү мүмкүн. Эгерде кийинчерээк бул мөөнөт дагы үч-төрт жолу узартылбаса.
Бул азырынча сунуш гана, акыркы эрежелер бекитиле элек.
Эмне белгилүү?
- Каттоого 2026-жылдын 8-октябрына чейин алып келинген техника гана кирет.
- Ээлерине каттоо үчүн төрт ай берилет.
- А1 категориясы боюнча окутуу бир күнгө чейин кыскартылат.
- Документ жок болгондо киргизүү күнү катары 2026-жылдын 7-октябры эсептелет.
- Катталбаган техника сот аркылуу утилдештирилиши мүмкүн.
Учурда бул демилге талкуу баскычында турат жана анын кабыл алынышы боюнча расмий чечим чыга элек.
