«Газпром Кыргызстан» компаниясы 2014-жылдан тартып Кыргызстандын газ инфраструктурасын жаңылоого жана кеңейтүүгө олуттуу каражат бөлүп келет. Аталган мезгил аралыгында компания тарабынан 34 миллиард сом инвестиция тартылып, бул акча газ ташуу жана бөлүштүрүү тармактарын өнүктүрүүгө жумшалды.
Компаниянын ишмердүүлүгүнүн маанилүү багыттарынын бири — калктуу конуштарды газдаштыруу болду. Инвестициялык программанын алкагында 54 айыл жана шаарча газ менен камсыз болду. Бул үчүн 1,5 миң чакырымдан ашык газ бөлүштүрүүчү түтүк тартылды.
Газдаштыруунун жыйынтыктары (2014-жылдан бери)
Газдаштыруунун натыйжасында 300 миңге жакын жаран үйүнө табигый газ киргизүү мүмкүнчүлүгүнө ээ болду. Учурда компаниянын жалпы абоненттеринин саны 450 миңге жетти. Өлкө боюнча газдаштыруу деңгээли да кыйла көтөрүлүп, 22 пайыздан 45 пайызга чыкты.
Мындан тышкары, «Газпром Кыргызстан» Кыргызстандын мурунку газ компаниясы «Кыргызгаз» ААКнын 65 миллион доллар өлчөмүндөгү карызын толугу менен жапты. Бул кадам өлкөнүн газ тармагын каржылык жактан турукташтырууга жана аны андан ары өнүктүрүүгө шарт түздү.
Компания мамлекеттик бюджетке да олуттуу салым кошуп келет. 2014-жылдан бери «Газпром Кыргызстан» тарабынан 3,5 миллиард сомдон ашык салык төлөндү. Бул каражаттар мамлекеттик программаларды каржылоого жана социалдык долбоорлорду ишке ашырууга жумшалды.
