Кыргызстанда «Заманбап биотехнологиялык продукциялардын коопсуздугу жөнүндө» мыйзамдын жаңы редакциясы иштелип чыкты. Бул документ тирүү өзгөртүлгөн организмдер жана биотехнологиялык продукциялар менен иштөөнүн атайын эрежелерин киргизүүнү караштырат.

Мыйзам долбоорун Жаратылыш ресурстары, экология жана техникалык көзөмөл министрлиги иштеп чыккан. Анын негизги максаты — биологиялык коопсуздукту камсыз кылуу, адамдын ден соолугун, айлана-чөйрөнү жана биологиялык ар түрдүүлүктү коргоо, ошондой эле Кыргызстандын Картахена биокоопсуздук протоколу боюнча эл аралык милдеттемелерин аткаруу болуп саналат.

Регуляциялоо объекттери

  • тирүү өзгөртүлгөн организмдер;
  • тирүү өзгөртүлгөн организмдерди камтыган продукциялар;
  • эгерде алар үчүн атайын коопсуздук чаралары каралса, заманбап биотехнологияны колдонуу менен алынган продукциялар;
  • мындай объекттерди колдонуу жана алар менен иштөөгө байланыштуу иш-аракеттер.

Тобокелдиктерди баалоо

Мыйзамдын негизги жоболорунун бири — белгиленген учурларда тобокелдиктерди милдеттүү түрдө баалоо болуп саналат. Бул процесс төмөнкү учурларда жүргүзүлөт:

  • тирүү өзгөртүлгөн организмдерди жабык системаларда колдонууда;
  • талаа сыноолорунда;
  • аларды атайын максат менен айлана-чөйрөгө чыгарууда;
  • мындай организмдерди өлкөгө киргизүүдө;
  • заманбап биотехнологиялык продукцияларды мамлекеттик каттоодон өткөрүүдө.