Бишкек шаарында өткөн Шанхай кызматташтык уюмунун тышкы иштер министрлеринин кеңешинин жыйынында Кыргызстандын Тышкы иштер министри Жээнбек Кулубаев менен Өзбекстандын тышкы иштер министри Бахтиёр Саидов жолугушту.
Жолугушуу учурунда кыргыз-өзбек кызматташтыгынын азыркы абалы жана келечеги талкууланды. Атайын көңүл Өзбекстандын президенти Шавкат Мирзиёевдин Кыргызстанга боло турган мамлекеттик сапарын даярдоого бурулду.
Министрлер соода-экономика, транспорт жана маданий-гуманитардык тармактар боюнча кызматташтык жакшы калыптанып жатканын белгиледи. Алар эки мамлекеттин элдеринин кызыкчылыгы үчүн жогорку деңгээлдеги макулдашууларды биргеликте ишке ашырууга даяр экенин ырастады.
