Ош облустук ИИБдин билдиришинче, Кемпир-Абад суу сактагычынын жээгинен белгисиз эркек кишинин сөөгү табылгандыгы тууралуу маалымат Өзгөн райондук ички иштер бөлүмүнө 7-августта келип түшкөн. Окуя болгон жерге барган ыкчам-тергөө тобу тарабынан каза болгон адамдын башы денесинен болжол менен 600 метр алыстыкта жайгашканы аныкталган.
Күнгө көпкө турганынан улам дененин айрым жерлеринин өңү өзгөрүп кеткен. Укук коргоо органдары тарабынан окуя боюнча алгачкы иликтөө иштери башталды. Өлүмдүн так себебин аныктоо үчүн соттук-медициналык экспертиза дайындалды.
Учурда милиция кызматкерлери каза болгон адамдын өздүгүн тактоо жана окуянын бардык жагдайларын аныктоо боюнча ыкчам-издөө иш-чараларын жүргүзүүдө.
