Дублинден Римге учуп бара жаткан Aer Lingus учагы Нормандиядагы Эвре аскер авиабазасына аргасыз конду. Бул база Парижден 100 чакырымдай батышта жайгашкан. Учактагы 151 жүргүнчү жана алты экипаж мүчөсү коопсуз жайга алып барылды. Учакты аскер сапёрлору текшере баштады.
Финляндиянын улуттук авиакомпаниясы Finnair Хельсинкиден Римге жана Венага учуучу эки каттамга коркунуч келип түшкөнүн тастыктады. Эки учак тең белгиленген аэропортторго аман-эсен конуп, жүргүнчүлөр учактан чыгышты. Авиакомпаниянын маалыматы боюнча, коркунучтар жалган болуп чыккан.
Римге багыт алган учакты италиялык согуштук учактар коштоп учуп келишкен. Венага каттамды Finnairдын буйрутмасы боюнча Jettime авиакомпаниясы аткарды. Ал кадимки тартипте конду.
Венгриянын Wizz Air авиакомпаниясы Миландан Варшавага учуучу каттамында жарылуу коркунучу тууралуу билдирди. Эскертүү учак учкан учурда келип түштү, андан кийин учакты Венага багытташты. Авиакомпания белгиленген коопсуздук эрежелерине ылайык иш алып барганын жана бийлик менен кызматташып жатканын билдирди.
Ошондой эле Варшавадан Брюсселге учуучу LOT каттамына да коркунуч келип түштү. Экипаж учакта текшерүү жүргүздү, конгондон кийин учакты жергиликтүү кызматтар кошумча карап чыгышты. Кооптуу же шектүү буюмдар табылган жок.
