Жарандык авиация мамлекеттик агенттиги «Манас» аэропортундагы «TezJet» учагынын кырсык учурунда болгон окуясынан кийин өлкөдөгү бардык авиакомпанияларга карата кошумча текшерүүлөрдү баштады.
Агенттиктин билдирүүсүндө инспекция учуу коопсуздугу талаптарынын аткарылышын, авиациялык техника жана эрежелерди сактоону текшерүүгө багытталгандыгы белгиленди.
Андан сырткары, «TezJet» авиакомпаниясынын каттамдарын убактылуу токтотуу тууралуу мурда берилген чечим текшерүүлөр аяктаганга жана кырсыктын бардык жагдайлары аныкталганга чейин күчүндө калат.
7-июлда «Манас» эл аралык аэропортунда «TezJet» компаниясынын McDonnell MD-83 учагы шассинин бузулушу себептүү учуу мүмкүнчүлүгүн жоготкон. Учурда бул окуяны Мамлекеттер аралык авиациялык комитет иликтеп жатат.
Учакта экипаж мүчөлөрүн кошкондо бардыгы 187 адам болгон жана эч ким жабыркаган эмес.
Жарандык авиация агенттиги жүргүнчүлөрдүн жана экипаждын коопсуздугу биринчи орунда экенин баса белгилеп, текшерүүлөрдүн жыйынтыгы жана кабыл алынган чечимдер тууралуу кийинки маалымат берилерин убада кылды.
