Жогорку Кеңештин депутаты Махабат Мавлянова бүгүн, 27-октябрда, этникалык кыргыздардын көйгөйлөрүн талкуулоо жана аларды чечүү жолдорун аныктоо боюнча жыйын өткөрдү. Жыынга мамлекеттик органдардын өкүлдөрү жана аймактардагы этникалык кыргыздардын өкүлдөрү катышты.
Талкууга көтөрүлгөн негизги маселелер
Талкууда этникалык кыргыздардын документтерин электрондук системаларга киргизүүдөгү тоскоолдуктардын жогору болушу негизги маселе катары белгиленди. Атап айтканда, «Түндүк» системасында этникалык кыргыздар тууралуу маалыматтардын толук чагылдырылбашы мамлекеттик кызматтарды алууда кыйынчылыктар жаратууда.
Көйгөйлөр жана тоскоолдуктар
- Балдарды мектепке жайгаштыруу маселелери
- Медициналык кызматтарды алуу
- Кайрылман статусун тариздөө
- Каттоо мөөнөтү боюнча административдик тоскоолдуктар
- Жубайлардын бири чет өлкөлүк жаран болгон үй-бүлөлөрдүн ипотекалык турак жай программаларына катышуу мүмкүнчүлүгү
Жыйындын жыйынтыгы
Жыйындын жыйынтыгы боюнча, Эмгек, социалдык камсыздоо жана миграция министрлигинин алдында министрдин биринчи орун басары Арлен Алиасовдун жетекчилиги астында жумушчу топ түзүү жана тиешелүү сунуштарды иштеп чыгуу чечими кабыл алынды.
Махабат Мавлянова көтөрүлгөн маселелерди мамлекеттик органдар менен биргеликте карап чыгып, мекендештердин укуктарын ишке ашыруудагы административдик тоскоолдуктарды жоюу зарыл экенин баса белгиледи.
