Евразия экономикалык бирлигинде экспорттук документтерди толтуруу процесси жаңы этапка өтөт. 10-ноябрда ЕЭК Коллегиясы мүчө өлкөлөрдүн товарлардын келип чыгуу сертификаттарын электрондук форматта тариздөөгө өтүүсү боюнча методикалык сунуштамаларды колдоп берди.
Бул чечим бирликке мүчө мамлекеттердин санариптештирүү процедурасына карата бирдиктүү мамилесин камсыз кылууга багытталган. Жаңы тартип боюнча документтерди тариздөө процессинин бардык этаптары — арыз берүүдөн баштап, берилген сертификаттын аныктыгын текшерүүгө чейинки бөлүктөр толугу менен электрондук форматка өтөт.
Санариптештирүүнүн негизги максаты — экспорттук документтерди даярдоо убактысын кыскартуу жана административдик процедураларды жөнөкөйлөтүү. Бул өзгөрүү тажрыйбалуу ишкерлер үчүн, анын ичинде Кыргызстандын бизнес чөйрөсү үчүн тышкы соода иштерин жүргүзүүнү бир топ ыңгайлуу кылат.
Ошондой эле, электрондук документ жүгүртүү мүчө мамлекеттердин ыйгарым укуктуу органдарынын ортосундагы өз ара аракеттенүүнү чыңдоого жана процедураларды бир калыпташтырууга шарт түзөт.
