28-октябрда Жогорку Кеңештин жыйынында депутат Илимбек Кубанычбеков «халал» продукциясына сертификат берген уюмдун ишин текшерүү зарылдыгын айтты. Ал өз сөзүндө айрым товарларда «халал» деген жазуу бар экенин, бирок этикеткадагы курамда чочконун эти көрсөтүлгөнүн, мындай фактылар катталып жатканын белгиледи.
Депутат сертификаттарды берүүнүн мыйзамдуулугун текшерип, эгерде мыйзам бузуулар аныкталса, тиешелүү чараларды көрүүнү суранды. Ал өзгөчө «Халал индустриясын өнүктүрүү борборуна» көңүл бурууну өтүндү.
Кубанычбеков белгилегендей, аталган борбор өндүрүш ишканаларына продукциянын халал талаптарына ылайык келгени тууралуу сертификат берет. Бирок, анын айтымында, товарда керектүү сертификат болгонуна карабастан, этикеткасында чочконун эти камтылганы көрсөтүлгөн учурлар кездешет.
Ошондой эле депутат продуктулардын курамын текшерүүнү, сертификаттарды берүүнүн мыйзамдуулугун изилдөөнү жана эгерде мыйзамсыз берүүлөр аныкталса, борборго карата чара көрүүнү талап кылды.
Депутаттын бул билдирүүсү коомчулукта кеңири талкуу жаратты. Көпчүлүк серепчилер халал продукциясынын стандарттарын тактоо жана көзөмөлдү күчөтүү зарылдыгын белгилешет.
