Бишкек шаарында кургап калган же авариялык абалдагы дарактар шаар тургундарынын өмүрүнө жана мүлкүнө коркунуч келтириши мүмкүн. Ошондуктан адистер аларды өз убагында таап, жок кылуу аракетин көрүүдө.
«Бишкекзеленстрой» муниципалдык ишканасынын маалыматы боюнча, 2023-жылы 70, 2024-жылы 125, ал эми 2025-жылы 53 ушундай учур катталган. Быйыл болсо январь айынан тарта 38 учур аныкталган.
Профилактикалык иштер бардык райондордо
Учурда ишкананын адистери борбордун бардык райондорунда жашыл өсүмдүктөргө санитардык кыркуу жүргүзүп, аларды багуу иштерин улантууда. Алар негизги дөңгөчтөрдү алсыратып жаткан жапайы өсүмдүктөрдү жок кылып, оорулардан сакташ үчүн кесилген жерлерди атайын каражаттар менен иштетишет.
Кесилген бутактар менен майда өсүмдүктөр жер семирткичке айландырылып, кайрадан жашыл аймактарды өстүрүүгө пайдаланылат.
Дарактардын коркунучу жана кесилген жыгачтын тагдыры
Кургак жана өлгөн дарактар катуу шамал учурунда кулап, турак жайларга, башка мүлктөргө зыян келтириши же адамдарга жаракат алып келиши мүмкүн экени белгиленди. Ошондуктан авариялык дарактарды аныктоо жана жок кылуу боюнча профилактикалык иштер тынымсыз жүргүзүлөт.
Ал эми ири дөңгөчтөр менен кесилген жыгачтар таштандыга ыргытылбастан, жашоосу төмөн үй-бүлөлөргө берилет.
