АКШнын Транспорт министри Шон Даффинин билдиришинче, жекшемби күнү, 1-ноябрда, күндүз Флоридадагы турак жай кварталдарынын биринде бизнес-учак кырсыкка учураган. Learjet 60 үлгүсүндөгү учактын ичиндеги тогуз кишинин баары каза болгон.
Авиакырсык Крестхейвенден анча алыс эмес, Палм-Бич аймагындагы президент Дональд Трамптын Мар-а-Лаго резиденциясынан болжол менен 14 чакырым алыстыкта катталган.
Окуя болгон жерден тартылган кадрларда турак жай кварталындагы жолдо пайда болгон чуңкур, өрт очоктору жана Learjet 60 учагынын тегерекке чачыраган сыныктары көрүнөт.
АКШнын Федералдык жарандык авиация башкармалыгынын (FAA) маалыматы боюнча, учак Остин шаарынан (Техас штаты) учуп чыгып, Багам аралдарына бет алган.
Даффи болгон окуяны «коркунучтуу трагедия» деп атап, FAA иликтөөгө көмөктөшүү үчүн окуя болгон жерге адистер тобун жибере турганын билдирди. Иликтөөнү Улуттук транспорт коопсуздук кеңеши (NTSB) жүргүзөт.
Палм-Бич округунун шерифинин кеңсеси кырсык «Милитари-трейл» (Military Trail) жолунда — соода ишканалары жана коомдук тамактануу жайлары жайгашкан алты тилкелүү магистралда болгонун билдирди.
Учакта кимдер болгону, ошондой эле жерде жаткан адамдардын жабыркаганы тууралуу маалымат азырынча тактала элек.
