Социалдык тармактарда 17-ноябрдан тарта дүйнө жүзү боюнча интернет өчүрүлүп, айрым өлкөлөрдө үч айга созула турган "санариптик апокалипсис" башталат деген имиштер активдүү талкууланууда. Колдонуучулар "бийликтин кабарларына" шилтеме беришип, бири-бирине азык-түлүк жана суу сактоону, накталай акча алууну, ал тургай алтын менен күмүш сатып алууну сунуштап жатышат.
Бирок, Kaktus.media редакциясы бул маалыматтарды текшерип көрүп, алардын эч кандай расмий негизи жок экенин аныктады.
Имиштер кайдан чыкты?
Бул күмөндүү посттор интернетке октябрь айынын аягында пайда боло баштаган. Маалымат каражаттарынын жана фактчекерлердин маалыматы боюнча, аларды биринчилерден болуп X социалдык тармагындагы Wesley деген колдонуучу жарыялаган. Ал өз постуна "Түз эле даркнеттен" деген аталыш коюп, "тастыкталбаган булакка" таянган.
Анын "пайгамбарлыгына" ылайык, баары "COVID 2.0" деп аталган окуядан башталат: ири банктар хакердик чабуулга кабылып, маалыматтар толугу менен жок кылынат, миңдеген эсептерде нөлдүк баланс көрсөтүлөт. Андан соң глобалдык тармак үч айга өчүрүлүп, "супер өнүккөн жасалма интеллект" ушул убакыт ичинде бардык кемчиликтерди оңдойт. Посттун аягында "Алар биз билбеген эмнени билишет?" деген суроо коюлган.
Посттун таралышы
Бул пост кыска убакыттын ичинде абдан чоң популярдуулукка ээ болуп, тема социалдык тармактарда тез тарай баштаган. Кыргызстандын интернет сегментине бул имиштер бир-эки күн мурун гана жетип келген.
Эмне себептен бул имиштер кеңири талкууланууда?
Фактчекерлер бул имиштердин бир нече батыш өлкөлөрүнүн айрым министрликтеринин жарыялары менен дал келип калганын белгилешет. Тактап айтканда, тигил же бул мамлекеттик органдар интернет коопсуздугу боюнча эскертүүлөрдү жарыялашкан, бул болсо имиштердин жайылышына шарт түзгөн.
Бирок, адистер бул жарыялардын интернетти пландуу өчүрүү менен эч кандай байланышы жок экенин баса белгилешет. Мамлекеттик органдар көбүнчө мүмкүн болуучу киберчабуулдардан коргонуу боюнча эскертүүлөрдү беришет, бирок бул эч качан глобалдык өчүрүүнү билдирбейт.
Андыктан, 17-ноябрда интернет өчүрүлөт деген маалымат — фейк. Расмий булактар мындай кадам жөнүндө эч кандай маалымат берген эмес жана эч кандай негиз жок.
