Бүгүн, 30-октябрда, Кыргызстан боюнча суткалык электр энергиясын керектөө 66 миллион 22 миң кВт/саатты түздү. Бул маалыматты «Кыргызстан улуттук электр тармагы» ААК берди.
Былтыр ушул эле күнү бул көрсөткүч 51 миллион 131 миң кВт/саат болгон. Демек, быйыл керектөө 14 миллион 891 миң кВт/саатка, башкача айтканда 29,1%га өскөн.
Эске салсак, 27-октябрда күзгү рекорд катталган: ошондо бир суткада 64,3 миллион кВт/саат электр энергиясы керектелген. Анын ичинен Бишкек шаарынын үлүшү 14 миллион 310 миң кВт/саатты түзүп, былтыркыга салыштырмалуу 3 миллион 654 миң кВт/саатка көбөйгөн.
Электр энергиясын керектөө
Мындай көрсөткүчтөр кыш мезгилине мүнөздүү. Суук түшкөндөн кийин адамдар электр приборлорун массалык түрдө күйгүзө башташты.
Энергетиктердин айтымында, электр энергиясын керектөөнүн көбөйүшү аба ырайынын кескин суукташы менен байланыштуу. 28-октябрдан тарта Бишкекте жылуулук бериле баштады, аймактардагы казанканалар да жылытуу мезгилин баштаганын кабарлашты. Бирок системаны толук ишке киргизип, бардык абоненттерге жылуулук берүү үчүн бир нече күн керектелүүдө.
Ошондуктан айрым үйлөрдө дагы эле жылуулук жок, жарандар жылыткыч аппараттарды өчүрө элек. Бул электр энергиясын керектөөнүн жогору бойдон калышына алып келүүдө.
