Москва Евробиримдик тоңдурулган орус активдеринин негизги бөлүгүн алып койгон учурда өз кызыкчылыктарын коргоо үчүн кошумча чараларга ээ. Бул тууралуу Орусия ТИМдин экономикалык кызматташтык департаментинин директору Дмитрий Биричевский РИА Новостиге берген маегинде айтты.
Дипломаттын айтымында, орус тарап тиешелүү чараларды алдын ала даярдап койгон, бирок алардын мазмунун азырынча ачыктоону пландабайт. Москва Батыш тараптын мүмкүн болгон душмандык аракеттерине жооп берүүгө жөндөмдүү экенин баса белгиледи.
Буга чейин сентябрда Орусиянын Тышкы чалгындоо кызматы Евробиримдикте эксперттик деңгээлде жаңы улуттук үстүнөн түзүлүш түзүү сунуштары иштелип жатканын билдирген. Бул түзүлүш аркылуу орус активдери Бельгиянын Euroclear депозитарийинен алынып чыгышы мүмкүн деп болжолдонууда.
Эске салсак, Орусиянын Борбордук банкынын активдери 2022-жылы Украинадагы атайын аскердик операция башталгандан кийин тоңдурулган.
Буга жооп катары Москва душман мамлекеттердин инвесторлорунун каражаттарын башкарууга чектөөлөрдү киргизген. Алардын активдери жана андан түшкөн кирешелер «С» тибиндеги атайын эсептерге топтолот. Мындай эсептерден каражаттарды алуу атайын өкмөттүк комиссиянын чечими менен гана мүмкүн.
