ИДП өсүп, айлык акы көбөйүүдө. Бирок бул акчага канчалык көп нерсе сатып алууга болот? Кыргызстанда бүгүн ким байып жатат — айлыгы көтөрүлгөн кызматкерби, ишкерби же расмий статистикада көрүнбөгөн кирешелүү крипторыноктун катышуучусубу? Ушул суроолорго Борбордук Азия университетинин Мамлекеттик башкаруу жана саясат институтунун директорунун орун басары, улук илимий кызматкери Канат Тилекеев жооп берди.
Анын айтымында, жыргалчылык чындыгында эле жакшырууда, бирок жалпы көрсөткүчтөрдүн артында ар кандай окуялар жатат. Тилекеевдин баамында, байкаларлык өсүш бар, бирок ал калктын бардык катмарына бирдей тиешелүү эмес.
Ал соода, туризм, финансы сектору жана IT тармагында иштөө мүмкүнчүлүктөрү көбөйгөнүн, мамлекеттик сектордо айлык акы өскөнүн белгиледи. Бирок бул өсүү бир гана адам иштеген жана кирешенин көп бөлүгү азык-түлүккө кеткен үй-бүлө үчүн эмнени өзгөртөт?
Экономист байлык маселесин статистикадан көрүү кыйын экенин айтат. Ал крипторынокту акча агымдарынын ачык эместигинин мисалы катары көрсөтүп, төмөнкүдөй божомол айтат:
Айлык менен жашагандардын кирешеси азырынча инфляциядан ашып түшүүдө, бирок азык-түлүктүн кымбатташы кедей үй-бүлөлөр үчүн өзгөчө оор. Тилекеев сатып алуулардын өсүшүнүн артында эмгек акы гана эмес, керектөө кредиттери да турганын кошумчалады.







