Кыргызстандык жазуучу Султан Раевди адабият боюнча Нобель сыйлыгына көрсөтүү сунушу айтылды. Бул демилгени журналист Нурканбек Керимбаев 28-октябрда жарыяланган «Кыргыз адабиятынын султаны Нобель сыйлыгын ала алабы?» деген макаласында көтөрдү.
Автордун пикиринде, Султан Раев азыркы кыргыз адабиятынын эң татыктуу өкүлдөрүнүн бири жана анын чыгармалары эл аралык таанууга татыктуу.
Нурканбек Керимбаев дүйнөлүк таанууга ээ болгонуна карабай, Нобель сыйлыгын ала албаган Чингиз Айтматовду эске салды. Ал муну тарыхый адилетсиздик деп атап, Кыргызстан кийинки муун жазуучулары аркылуу кадырлуу адабий сыйлыкка ээ болоруна ишенерин билдирди.
Автор Султан Раевдин «Жанжаза» романына өзгөчө көңүл бурду. Анын айтымында, бул чыгарма Нью-Йоркто англис тилинде жарык көргөн жана чет элдик окурмандар менен сынчылардын кызыгуусун жараткан.
Ошондой эле ал жазуучунун «Топон» жана «Кашаба» романдарынын эл аралык таанылуусун белгиледи.
Нурканбек Керимбаевдин ою боюнча, Султан Раевдин чыгармалары көркөмдүк деңгээли жана тематикасы жагынан Нобель сыйлыгына каралууга татыктуу.
Журналист ошондой эле мамлекетти кыргыз адабиятын эл аралык аренада илгерилетүүдө четте калбоого чакырды.
